جبلنا ماغازين – صوتنا

ناجي الفليطي، مواطن لبناني من بلدة عرسال، يضع حداً لحياته شنقاً (1 كانون الأول 2019) بعدما عجز عن تأمين مبلغ ألف ليرة طلبته منه ابنته لشراء منقوشة، فيما هو عاطل عن العمل منذ أشهر ومديون بمبلغ 500 دولار لدكاكين الحي وزوجته مصابة بالسرطان...

عن هذه المأساة، كتب الشاعر روميو عويس (أستراليا) الآتي:

ألف ليره!.. ما مَـعـي

ومْسَكَّره بواب السعي

وضايق بوجّي المدى

والجوع بنتي مْهَدَّدا!..

وليره يا بنتي ما معي

من وين بدِّك تشبعي؟

لمّا بمَوْتي بتسمعي!!..

لا تزعَلي ولا تدمَعي

بنْهي حياتي ع الهدا!..

أَسْـتَـر إلي تْـراب الـردى

لِمْ ألف ليره ما معي!..

لمنقوشتك.. تَ تشبعي

بكرا حدا.. بعد النعي!..

بيطفي الحريق بأضلعي

بكرا.. بيتْبَرّع حـدا

يوم العزا.. بوجبة غَـدا

من لقمة الرحمه شْبَعي

الف ليره؟ ما مَـعـي!..

لمّا بلايي بترجَعي

ع البيت لا تتوَجَّعي

دور اليتامى عْـوايـدا

تلاقي اليتامى وتاخدا

بدار اليتامى بتشبعي

منقوشتك نَقشِت مَعي!

*روميو عويس - شاعر لبناني مهجري مقيم في سيدني، أستراليا