صفحة حرة – جبلنا ماغازين

كان حلمنا نعيش ببلد ... مش ضروري سويسرا الشرق
وطن يكبر في الولد ... ويحسّ وجودو بيعمل فرق
بس الحلم بقي حلم ... والواقع فقر وتعتير
زلّ وقهر ونفس الفيلم ... وقلق دايم عل مصير
قالولنا فترة وبتقطع ... وصرنا ناطرين الفرج
روحنا كانت رح ... تطلع مخبايين تحت الدرج
تركنا الحكّام يسوقونا ... متل الغنم عل مسلخ 
خلّيناهن يسقونا ... سفنجة خلّ ودمّ ملطّخ
أوقات بسأل حالي ... ليش خلقنا بهل البلد
عايشين بين الزبالة ... وما حدن إلو سند
هون الانسان بموت ... وما بيسأل عنّو حدا
والفقر عل بيوت بفوت ... وبيقعد جوّا عل هدا
من الأرض اختفا البشر ... وع الناس الخوف فيّا
صارت قلوب الناس حجر ... ما بيفرق معا خيّا
ديعانِك يا إيام زمان ... كان بال الناس فاضي
كانت الدنيي أمان ... وكل واحد بحالو راضي
هلأ تغيّرت الايام ... وصرنا بالوطن أغراب 
سرقوا منا الاحلام ... والعدالة بِ إضراب
كل شبّ عم يتخرّج ... ضابب شنطتو من زمان 
ع شو باقي يتفرّج ... عل القهر والحرمان؟
بِهاجر وبيترك البيت ... وعيونو ملياني دموع
ت ما يقول يا ريت ... ويقضّي عمرو يضوّي شموع
يمكن نحن بدنا كتير ... تنستاهل هيدا الوطن
خوفي نضلّ بالتعتير ... عم تاكلنا نار الفتن 
ولمن شاف البلد مجروح ... ناص الأمل ويِئِس ومَلّ
ولو خلّو للوطن روح ... كان من يأسو وقف وفلّ

*رمزي سلوان ، خواطر من صدى الروح

*رمزي سلوان، محام لبناني متخصّص بالملكية الفكرية، وصاحب كتابات شعرية ونثرية بالفرنسية والعربية يمكن قراءتها على الرابط التالي:

 www.facebook.com/groups/lesechosdemoname/