بدك تسافر؟ ...لوين؟

جبلنا ماغازين – صوتنا

كتب كمال زين الدين (من الرياض في المملكة العربية السعودية) الآتي:

"بدك تسافر ع فرنسا... وفرنسا أحلى من لبنان.
بدك تسافر ع كندا... وكندا أحلى من لبنان.
بدك تسافر ع دولة اوروبية او على أستراليا لأن الحياة هونيك افضل من لبنان.
بدك تروح ع  الخليج او افريقيا لأن فيها مصاري اكتر من لبنان.

لبنان ما في أمان وفي فساد ومذهبية وما في قانون...  

طيب، مين ناطر ليصلح الوضع؟ بيك أو جدك؟ يلي طلع بايدن عملوه...
بتعرف ليه هيدي الدول الحياة فيها أفضل من لبنان؟ الجواب بسيط: لان فيها قانون ولأن الشعب اللي فيها حط القانون والشباب ما هربوا وتركوا بلدن للزعران والفاسدين.
وهيدي الدول ما فيها مصاري اكتر من لبنان، بس ما فيها حراميي تسرق متل بلبنان!

وين ما سافرت وهاجرت ما راح يكون إلك كرامة متل ببلدك.
لو شباب لبنان بيفكروا صح وبيعملوا جهد حتى يصير عندن دولة، ولو بعشرة بالمية من الجهد يلي بيعملوا كرمال الواسطة والسمسرة والزحف ورا الزعما والنافذين، كان أكيد صار في دولة.

الشعوب المتحضره قامت وتطورت بفضل الشباب يلي ضحوا وناضلوا من اجل خلق كيان يحفظ كرامتهم..  وكان القانون فيها هو الأساس وركيزة الركائز.

من 100 سنة هرب جدك، وبيك رضخ، وانت اليوم إذا هربت ما راح تحل المشكلة...
شو رح يكون مستقبلك ومستقبل ولادك بالغربة؟ راح تضلك غريب وحقوقك منقوصه.
في كتير متلك بلبنان، بيحبوا يكون في دوله وقانون. حاول... أكيد فيك تصنع مستقبلك بشرف!"

*كمال زين الدين – الرياض (المملكة العربية السعودية)



The content of this website is the property of Jabalna Magazine © and may not be reproduced in any form without explicit written permission by the publisher.

Recommended